Toyota ელექტრომობილების ხაზს აფართოებს
Feb 23, 2026
აშშ-ში ელექტრომობილებზე (EV) მოთხოვნის შემცირებისა და ფედერალური საგადასახადო შეღავათების გაუქმების ფონზე, იაპონური ავტოგიგანტი Toyota, კონკურენტებისგან განსხვავებით, ელექტრომობილების ხაზის მკვეთრ გაფართოებას გეგმავს.
ბოლო თვეებში ელექტრომობილების გაყიდვების ვარდნამ ისეთ მწარმოებლებს, როგორებიცაა Ford-ი და Mazda, ახალი მოდელების გამოშვების გადადებისკენ ან გაუქმებისკენ უბიძგა (მაგალითად, Ford-მა შეაჩერა F-150 Lightning-ის წარმოება). თუმცა, Toyota, რომელიც სრულად ელექტრო ტექნოლოგიების ათვისებაში აქამდე ერთ-ერთ ყველაზე კონსერვატიულ კომპანიად მიიჩნეოდა, ამერიკულ ბაზარზე წარმოდგენილი ელექტრომობილების რაოდენობას აოთხმაგებს.
წლის დასაწყისში Toyota-ს აშშ-ის ბაზარზე მხოლოდ ერთი სრულად ელექტრო მოდელი (bZ) ჰყავდა. ახლა კი, თებერვალში წარმოდგენილი ახალი Highlander EV-ის დებიუტით, კომპანიის სრულად ელექტრო ხაზი საგრძნობლად იზრდება. უახლოეს მომავალში მომხმარებელი შეძლებს არჩევანი გააკეთოს კომპაქტურ C-HR-ს, სტანდარტულ bZ-ს, გაზრდილი ზომის bZ Woodlands-სა და სამრიგიან Highlander EV-ს შორის.
Toyota Motor North America-ს ვიცე-პრეზიდენტის, დევიდ კრისტის განცხადებით, ბაზრის წილის მოსაპოვებლად კომპანიას ელექტრომობილების სივრცეში მრავალფეროვანი პროდუქტები სჭირდება.
ინდუსტრიის ანალიტიკოსების ნაწილი Toyota-ს ამ ნაბიჯს სკეპტიკურად უყურებს და მიიჩნევს, რომ ახალი მოდელების განვითარება 3-4 წლის წინ, ელექტრომობილებზე ხელსაყრელი რეგულაციებისა და ოპტიმისტური პროგნოზების პირობებში დაიწყო, ახლა კი კომპანიას უკან დასახევი გზა აღარ აქვს.
მეორე მხრივ, S&P Global Mobility-ის ექსპერტები მიიჩნევენ, რომ Toyota-ს ჰიბრიდული მოდელების დიდი წარმატება მას უპირატესობას ანიჭებს. ჰიბრიდების მფლობელები სრულად ელექტრომობილებზე გადასასვლელად უკეთ არიან განწყობილნი. გარდა ამისა, ახალი მოდელების გლობალურ ბაზარზე გატანა და ჩრდილოეთ კაროლინაში ახლახან გახსნილი ბატარეების ქარხანა კომპანიას წარმოების ხარჯების შემცირებაში დაეხმარება.
როგორც კომპანიის ხელმძღვანელობაში აცხადებენ, მათი მიზანი გრძელვადიანია. ფართო სეგმენტის დაკავებით, Toyota მზად იქნება ბაზარზე ლიდერობისთვის მაშინ, როდესაც ელექტრომობილებზე მოთხოვნა კვლავ ზრდას დაიწყებს.