Polestar ჩინურ ბაზარს ტოვებს? ბრენდმა ქვეყანაში ყველა შოურუმი დახურა
Oct 23, 2025
შვედურ-ჩინურმა პრემიუმ ელექტრომობილების ბრენდმა Polestar-მა ჩინეთში თავისი ბოლო ფიზიკური მაღაზიაც დახურა. გადაწყვეტილება მოჰყვა გაყიდვების მკვეთრ ვარდნას - ბრენდმა 2025 წლის პირველ ნახევარში ქვეყანაში სულ მხოლოდ 69 ავტომობილი გაყიდა.
ბრენდის განცხადებით, შანხაის L+ Plaza-ში მდებარე შოურუმის დახურვა არის სტრატეგიული ნაბიჯი, რომელიც მიზნად ისახავს გაყიდვების მოდელის გადატანას სრულიად ონლაინ პლატფორმებზე.
როგორც Polestar-ის წარმომადგენელმა ადგილობრივ მედიას უთხრა, მომხმარებლებისთვის სერვისები და გარანტიები უცვლელად შენარჩუნდება, თუმცა ახალი გაყიდვები მხოლოდ ციფრული არხებით განხორციელდება - ისევე როგორც სხვა საერთაშორისო ბრენდები აკეთებენ მკვეთრად კონკურენტულ ჩინურ ბაზარზე.
Polestar თავდაპირველად Volvo-ს სპორტული განყოფილება იყო, მაგრამ 2017 წლიდან გახდა დამოუკიდებელი პრემიუმ EV ბრენდი Volvo-სა და Geely Holding-ის თანამფლობელობით.
თუმცა ბოლო წლებში ბრენდის პოზიციები ჩინეთში შესუსტდა - ადგილობრივმა კონკურენტებმა, როგორებიცაა BYD, Nio და XPeng, ბაზრის დიდი წილი ჩაიგდეს ხელში.
2025 წელს Volvo-მ Polestar-ში თავისი წილი 16%-მდე შეამცირა, ხოლო Geely-მ სრული საკონტროლო პაკეტი მოიპოვა, რასაც მოჰყვა 200-მილიონიანი დოლარიანი ინვესტიცია Geely-სთან დაკავშირებული ფონდიდან.
მიუხედავად ფინანსური მხარდაჭერისა, ბრენდის მომავალზე კითხვის ნიშნები კვლავ რჩება - რამდენიმე ანალიტიკოსი არ გამორიცხავს Polestar-ის სრულიად გასვლას ჩინეთის ბაზრიდან წლის ბოლოსთვის.
მიუხედავად რთული მდგომარეობისა ჩინეთში, Polestar აგრძელებს ოპერირებას ევროპასა და ჩრდილოეთ ამერიკაში, სადაც გაყიდვები სტაბილურად იზრდება. ბრენდი ხაზს უსვამს, რომ მიზანია მაღალი ხარისხის, ტექნოლოგიურად დახვეწილი EV-ების წარმოება და გაყიდვები ბაზრებზე, სადაც პრემიუმ სეგმენტი უფრო აქტიურად ვითარდება.