2025 წელს ყოველი მე-4 გაყიდული ავტომობილი ელექტრო იქნება — და ეს მხოლოდ დასაწყისია
May 15, 2025
ელექტრომობილების ბუმი გრძელდება – საერთაშორისო ენერგეტიკული სააგენტოს (IEA) მონაცემებით, 2025 წელს მსოფლიოში გაყიდული ყოველი მეოთხე ავტომობილი ელექტრო იქნება.
გავლენიანი ორგანიზაციის „Global EV Outlook 2025“-ის მიხედვით, თუ ტრენდი შენარჩუნდა, ელექტრომობილებმა შესაძლოა 2030 წლისთვის ახალი მანქანების 40%-ზე მეტი დაიკავონ.
მიუხედავად ზოგადი ეკონომიკური სირთულეებისა, 2024 წელს 17 მილიონი ელექტრომობილი გაიყიდა – რაც პირველად აჭარბებს გლობალურ გაყიდვების 20%-იან წილს. ეს იმპულსი 2025 წლის დასაწყისშიც გაგრძელდა: პირველ კვარტალში გაყიდვები 35%-ით გაიზარდა წინა წელთან შედარებით. ყველა დიდ ბაზარზე რეკორდული მაჩვენებლები დაფიქსირდა.
ჩინეთი კვლავ ლიდერობს – 2024 წელს იქ გაყიდული მანქანების თითქმის ნახევარი ელექტრო იყო, რაც 11 მილიონზე მეტ ერთეულს შეადგენს. ეს მეტია, ვიდრე 2 წლის წინ მთელმა სამყარომ ერთად გაყიდა. ზრდა თვალსაჩინოა ასევე აზიისა და ლათინური ამერიკის განვითარებად ბაზრებზე, სადაც გასულ წელს EV-ების გაყიდვები 60%-ზე მეტად გაიზარდა.
აშშ-ში EV-ების გაყიდვები 10%-ით გაიზარდა, რაც გაყიდვების მთლიანობის 10%-ზე მეტს შეადგენს.
ევროპაში გაყიდვები სტაბილურია – სტიმულირების შემცირების ფონზე წილი დაახლოებით 20%-ზე შენარჩუნდა.
რის ხარჯზე იზრდება მოთხოვნა?
ბატარეების იაფად წარმოებისა და მწარმოებლებს შორის კონკურენციის ფონზე, 2024 წელს ელექტრომობილების ფასი მნიშვნელოვნად დაეცა.
ჩინეთში, გასულ წელს გაყიდული EV-ების 2/3 უფრო იაფი იყო, ვიდრე ბენზინზე მომუშავე ანალოგები – და ეს სუბსიდიების გარეშეც.
თუმცა აშშ-სა და გერმანიაში, ელექტრომობილები ჯერ კიდევ დაახლოებით 30%-ით (აშშ) და 20%-ით (გერმანია) ძვირია, ვიდრე ჩვეულებრივი მანქანები.
სამაგიეროდ, საოპერაციო ხარჯები გაცილებით დაბალია. ევროპაში, ელექტრომობილის დატენვა და ექსპლუატაცია დაახლოებით ნახევარ ფასად ჯდება, თუნდაც ნავთობის ფასი $40-მდე დაეცეს.
ბუმია ელექტრო სატვირთო მანქანებშიც
2024 წელს ელექტრო სატვირთოების გაყიდვები გლობალურად 80%-ით გაიზარდა და მათმა წილმა ბაზარზე თითქმის 2% შეადგინა. ზრდის ძირითადი ნაწილი ისევ ჩინეთიდან მოდის, სადაც ზოგიერთი მძიმე ელექტრო სატვირთო უკვე იაფია სარგებლობაში, ვიდრე დიზელზე მომუშავე ანალოგი.