BMW-მ მომავლის ელექტრო M3-ის კონცეპტი "M Concept Neue Klasse" ოფიციალურად წარადგინა
Jun 14, 2026
მიუხედავად იმისა, რომ BMW 2021 წლიდან (i4 M50-ის გამოსვლიდან) ყიდის "M" სერიის ელექტრომობილებს, ბრენდის ხაზში აქამდე არ არსებობდა სრულფასოვანი, ექსკლუზიური "M" მოდელი შიგაწვის ძრავის გარეშე. ეს რეალობა სულ მალე შეიცვლება. მიმდინარე უქმეებზე, ლე მანის 24-საათიანი რბოლის ფარგლებში, გერმანულმა გიგანტმა ოფიციალურად წარმოადგინა BMW M Concept Neue Klasse - ავტომობილი, რომელიც რეალურად მომავალი ელექტრო M3-ის ზუსტი წინამორბედია.
დიზაინი: ფუტურიზმისა და ისტორიის სინთეზი
ახალი კონცეპტი ბევრად უფრო ახლოსაა სერიულ ვერსიასთან, ვიდრე მისი წინამორბედი VDX პროექტი. ის დაფუძნებულია ახლახან წარდგენილ 2027 წლის i3 ელექტრო სედანზე, თუმცა გამოირჩევა გაფართოებული თვლების თაღებითა და აგრესიული სპორტული ელემენტებით:
shark nose და იხვის კუდი: ავტომობილის წინა ნაწილს ე.წ. "აკულის ცხვირის" (shark nose) ფორმა აქვს, ხოლო უკანა ნაწილს კლასიკური "იხვის კუდის" (ducktail) სპოილერი ამშვენებს.
ეკო-მასალები: კაპოტის V-სებრი საჰაეროები და გიგანტური უკანა დიფუზორი დამზადებულია ბუნებრივი ბოჭკოვანი კომპოზიტებისგან (natural-fiber composites) - BMW ოფიციალურად აცხადებს, რომ ტრადიციულ ნახშირბადის ბოჭკოს (Carbon Fiber) ეტაპობრივად ანაცვლებს.
რბოლის გენი: ავტომობილს აქვს ცენტრალური საკეტით აღჭურვილი (center-lock) დისკები, სპორტული სარკეები და ორმაგი ყვითელი ფარის განათება, რაც Circuit de La Sarthe-ზე მოასპარეზე M Hybrid V8 სარბოლო პროტოტიპის პირდაპირი გამოძახილია.
ინტერიერი: ოთხი სავარძელი და უსაფრთხოების კარკასი
სალონში სპორტული ექსტრემი სუფევს. უკანა რიგში სივრცე შეზღუდულია, რადგან იქ დამონტაჟებულია უსაფრთხოების როლბარი (Roll bar), რომელიც შავი ნუბუკის ტყავითაა შეფუთული. ეს მასალა პირველად გამოიყენება M სერიის მანქანაში და ის ასევე გვხვდება კარებზე და ახალ საჭეზე, რომელსაც ექსკლუზიური წითელი "M" ღილაკები დაემატა.
ტექნიკური მონსტრი: 4 ელექტროძრავა
მიუხედავად იმისა, რომ BMW ზუსტ ციფრებს ჯერ არ აკონკრეტებს, რამდენიმე უმნიშვნელოვანესი დეტალი უკვე დადასტურდა:
კვადრო-ძრავა: ავტომობილი აღჭურვილია ოთხი დამოუკიდებელი ელექტროძრავით (თითო ძრავა თითოეულ თვალზე). ეს ნიშნავს სრულ ამძრაობას, თუმცა სისტემას შეეძლება წინა ძრავების სრული გათიშვა სუფთა უკანა ამძრაობის (RWD) მისაღებად.
ბატარეა და 800V არქიტექტურა: სპეციალურად M მოდელებისთვის შემუშავდა ცილინდრული უჯრედების მქონე ახალი ელემენტების პაკეტი, რომლის ტევადობაც 100 კვტ/სთ-ზე მეტია. 800-ვოლტიანი არქიტექტურის წყალობით, ავტომობილს ულტრასწრაფი, 400 კილოვატამდე სიმძლავრის დამუხტვის მხარდაჭერა ექნება.
სახელწოდება და ბენზინის მომავალი
ინსაიდერების ინფორმაციით, BMW-მ უარი თქვა სახლწოდება "iM3"-ზე. სერიულ მოდელს, რომელიც ბაზარზე 2027 წელს გამოვა, უბრალოდ BMW M3 ერქმევა. ეს მიანიშნებს კომპანიის დიდ თავდაჯერებაზე, რომ ელექტრომობილი სრულად გაამართლებს იმ ლეგენდარულ მემკვიდრეობას, რომელსაც M3 სახელი 1986 წლიდან (E30-ის ეპოქიდან) ატარებს.
ამასთან, ბენზინის მოყვარულებს სანერვიულო არ აქვთ: BMW პარალელურად ავითარებს M3-ის ახალ თაობას ტრადიციული, მწკრივი ექვსცილინდრიანი (Inline-Six) ბენზინის ძრავით, რომელიც ბაზარზე ელექტრო ვერსიის გამოსვლიდან დაახლოებით ერთ წელში, 2028 წელს გამოჩნდება. ელექტრო პლატფორმა კი საფუძველს ჩაუყრის სხვა მოდელებსაც, მათ შორის მომავალ X3 M-ს.