ავტომობილები წარსულია?! Xpeng-ის ტოპ-მენეჯერი კომპანიას ტოვებს და ჰუმანოიდი რობოტების შექმნას იწყებს
Apr 18, 2026
ჩინური ავტომწარმოებლის, Xpeng-ის ავტონომიური მართვის განყოფილების ყოფილი ხელმძღვანელი, ლი ლიიუნი ახალ კარიერულ ეტაპს იწყებს - ის რობოტიკის სტარტაპ EngineAI Robotics-ს უერთდება. ეს კიდევ ერთი ნათელი მაგალითია იმისა, თუ როგორ გადადიან ავტოპილოტის წამყვანი სპეციალისტები AI-სა და რობოტიკის (Embodied AI) მზარდ ინდუსტრიაში.
მრავალმილიონიანი დაფინანსება და EngineAI-ს ფონი
EngineAI 2023 წლის ოქტომბერში სერიული მეწარმის, ჭაო თონგიანგის მიერ დაარსდა. სულ ახლახან, 9 აპრილს, სტარტაპმა Series B რაუნდში 200 მილიონი დოლარის დაფინანსება მოიზიდა (მთავარი ინვესტორები: Henan Investment Group და მწარმოებელი გიგანტი Luxshare Precision). ამ ინვესტიციის შედეგად, კომპანიის ღირებულებამ 10 მილიარდ იუანს (1.47 მილიარდი დოლარი) გადააჭარბა.
სამომავლოდ კომპანია რობოტების ფიზიკურ შესაძლებლობებსა და მოძრაობის კონტროლის დახვეწაზე ფოკუსირდება. 2026 წლის განმავლობაში EngineAI ათობით რობოტის რეალიზაციას გეგმავს, რათა კონკრეტულ ინდუსტრიებში მათი პრაქტიკული გამოყენება დაიტესტოს.
ისტორიული კავშირები Xpeng-თან
საინტერესოა, რომ EngineAI-ს დამფუძნებელს Xpeng-თან მჭიდრო წარსული აკავშირებს. 2019 წელს მის მიერ დაარსებული რობოტიკის კომპანია Dogotix მოგვიანებით (2020 წელს) სწორედ Xpeng-მა შეისყიდა. ეს შენაძენი Xpeng-ის რობოტიკის განყოფილებად (Xpeng Robotics) გარდაიქმნა, რომელსაც ჭაო თონგიანგი 2021-2023 წლებში ხელმძღვანელობდა და პეკინში, შენჯენსა და სილიკონის ველზე 400-კაციან კვლევით გუნდს ედგა სათავეში.
ლი ლიიუნის გამოცდილება
რაც შეეხება ახალწვეულ ლი ლიიუნს, ის Xpeng-ის ავტონომიური მართვის გუნდს 2019 წელს შეუერთდა. 2023 წლის აგვისტოში, მას შემდეგ, რაც წინა ხელმძღვანელმა (ვუ სინჟოუმ) კომპანია დატოვა და Nvidia-ში გადავიდა, ლის სრულად ჩაჰბარდა ჭკვიანი მართვის სისტემები.
მისი ხელმძღვანელობით Xpeng-მა სანავიგაციო-ავტოპილოტის სისტემა ჩინეთის ასობით ქალაქში წარმატებით დანერგა. ლი ლიიუნმა კომპანია 2025 წლის 9 ოქტომბერს დატოვა, მის პოზიციაზე კი AI ექსპერტი, ლიუ სიანმინგი დაინიშნა.