ბიუჯეტური ელექტრომობილების მოთხოვნა ყოველდღიურად იზრდება, და Kia-ს ამ სეგმენტში ლიდერობა სურს. კომპანიის განცხადებით, Kia EV1 – მისი ახალი, კომპაქტური და ხელმისაწვდომი ელექტრომობილი – უკვე მზადდება. შესაძლოა, მისი პრეზენტაცია შემდეგ EV Day-ის ღონისძიებაზე ვიხილოთ.

რას ველოდებით Kia EV1-ისგან?

Kia-მ EV Day-ის ღონისძიებაზე უკვე წარმოგვიდგინა რამდენიმე საინტერესო ელექტრომობილი, რომლებიც ინდუსტრიაში დიდ აჟიოტაჟს იწვევს.

ამ ღონისძიებაზე პირველად ვიხილეთ EV4 – Kia-ს პირველი ელექტრო სედანი, და PV5 – კომპანიის პირველი სრულად ელექტრო ბიზნეს ფურგონი. თუმცა, ყველაზე დიდი სიურპრიზი EV2-ის კონცეპტუალური მოდელის წარდგენა იყო.

თუმცა, კომპანია აქ არ ჩერდება და გეგმავს კიდევ უფრო მცირე და ბიუჯეტური ელექტრომობილის შექმნას.

უფრო იაფი ელექტრომობილი უკვე მზადდება

Kia-ს აღმასრულებელმა დირექტორმა განაცხადა, რომ კომპანიას სჭირდება EV2-ზე უფრო პატარა და იაფი ელექტრომობილი.

მიუხედავად იმისა, რომ კონკრეტული ტექნიკური დეტალები ჯერ უცნობია, მოსალოდნელია, რომ ახალი მოდელი $31,000-ზე ნაკლები ეღირება, რაც მას Kia-ს ერთ-ერთ ყველაზე ხელმისაწვდომ ელექტრომობილად აქცევს.

EV1 vs. EV2 – რა იქნება განსხვავება?

Kia EV2 უკვე განიხილება კომპანიის “game-changer”-ად, რადგან მას ექნება ორი სხვადასხვა ტიპის ბატარეა:

• LFP ბატარეა – 300 კმ WLTP სვლის მარაგით

• NMC ბატარეა – 450 კმ WLTP სვლის მარაგით (გრძელი მანძილის ვერსია)

რაც შეეხება ზომებს, EV2-ის სიგრძე სავარაუდოდ 3,800 მმ იქნება, რაც ოდნავ მცირეა, ვიდრე Hyundai Inster EV (3,825 მმ).

Kia EV1 კიდევ უფრო კომპაქტური იქნება – დაახლოებით 3,600 მმ სიგრძის, რაც მას Kia Picanto-ს ზომის ელექტრომობილად აქცევს.

Kia-ს სტრატეგია ელექტრომობილების ბაზარზე

Kia-ს აქვს ამბიციური გეგმები მომდევნო წლებში. 2024 წელს კომპანიამ 200,000-ზე მეტი ელექტრომობილი გაყიდა და 2025 წელს ეს მაჩვენებელი 250,000-ს გადააჭარბებს.

კომპანია გეგმავს EV3, EV4, EV5, EV9 და განახლებულ EV6 მოდელების გაშვებას და 2030 წლისთვის 1.6 მილიონი ელექტრომობილის გაყიდვას განიხილავს, რაც მსოფლიო გაყიდვების 30%-ს შეადგენს.

გარდა ამისა, Kia აპირებს ელექტრო ფურგონების ბაზარზეც აქტიურ ოპერირებას PBV (Platform Beyond Vehicle) პროექტით, რომელიც მოიცავს:

• დისტრიბუციასა და ლოჯისტიკას

• მიწოდებისა და კურიერულ მომსახურებას

• მოძრავი მაღაზიებსა და პოპ-აპ კონცეფციებს

• მგზავრთა გადაყვანისა და ride-hailing სერვისებს

ახლა კი, EV1-ით Kia-ს სურს ბაზარზე კიდევ უფრო ხელმისაწვდომი ელექტრომობილი შესთავაზოს მომხმარებლებს. უფრო მნიშვნელოვანი კი ისაა, რომ Kia გლობალურ ბაზარზე ჩინური ბიუჯეტური EV-ების ტალღასთან შეჯიბრს გეგმავს.