მასკი ხვდება, რომ ტრამპის ადმინისტრაცია Tesla-ს დარტყმის ქვეშ აყენებს

როგორც ჩანს, ილონ მასკმა გააცნობიერა, რომ დონალდ ტრამპისა და რესპუბლიკური პარტიის პოლიტიკა დიდ საფრთხეს უქმნის Tesla-ს მომავლს. მიზეზი? მათი გადაწყვეტილება, გააუქმონ ის საგადასახადო შეღავათები და სტიმულები, რომლებიც წლების განმავლობაში Tesla-ს ელექტრომობილებსა და მზის ენერგიის ბიზნესს ძლიერად უწყობდა ხელს.

რაში მდგომარეობს პრობლემა?

კონგრესის მიერ მიღებული ბიუჯეტი, რომელსაც რესპუბლიკელები აკონტროლებენ, ფაქტობრივად ანადგურებს ბაიდენის ადმინისტრაციის მიერ მიღწეულ პროგრესს მწვანე ენერგიის მიმართულებით. ამ ცვლილებების მიხედვით:

• გაუქმებულია $7,500-იანი საგადასახადო კრედიტი ელექტრომობილებზე — ერთ-ერთი მთავარი ფაქტორი Tesla-ს გაყიდვებისთვის აშშ-ში

• გაუქმებულია სტიმულები ბატარეების წარმოებისთვისაც, რაც დიდ დარტყმას აყენებს Tesla-ს საწარმოო მიმართულებას

• ასევე გაუქმდა 30%-იანი კრედიტი მზის პანელებსა და ბატარეის შენახვის სისტემებზე, რაც პირდაპირ აზარალებს Tesla-ს ენერგეტიკულ განყოფილებას

Tesla-მ ოფიციალური განცხადება გაავრცელა და სენატს სთხოვა, წახალისების პროგრამები ერთდროულად კი არ გააუქმოს, არამედ თანმიმდევრულად, ეტაპობრივად შეამციროს:

„ენერგეტიკული კრედიტების მოულოდნელი გაუქმება საფრთხეს უქმნის აშშ-ის ენერგეტიკულ დამოუკიდებლობასა და ქსელის სტაბილურობას... აუცილებელია რაციონალური გზით განხორციელდეს ცვლილებები.“

მასკმა აღნიშნული განცხადება გააზიარა და აღნიშნა:

„ამჟამინდელი ხელისუფლება წყვეტს სტიმულებს ელექტრომობილებისთვის, თუმცა გაგრძელებულია მილიარდობით დოლარის მხარდაჭერა ნავთობისა და გაზის ინდუსტრიისთვის.“

შეგახსენებთ, რომ წარსულში მასკი აცხადებდა — მხარს დაუჭერდა სტიმულების გაუქმებას მხოლოდ იმ შემთხვევაში, თუ ისინი მთლიანად გაუქმდებოდა როგორც EV-ებისთვის, ასევე ნავთობის სექტორისთვის. ახლა კი ჩანს, რომ ეს პირობა დარღვეულია.

რას ნიშნავს ეს Tesla-სთვის?

• აშშ რჩება ერთადერთ დიდ ბაზრად, სადაც Tesla ჯერ კიდევ მოგებით ვაჭრობს

• EV კრედიტების გაუქმება, სავარაუდოდ, შეამცირებს მოთხოვნას კომპანიის მოდელებზე

• ენერგიის შენახვისა და მზის პანელების ბიზნესიც იბრკოლებს, რომელიც ბოლო ორი წლის განმავლობაში Tesla-ს ყველაზე მზარდი მიმართულება იყო

• სხვა ბაზრები — კანადა, ევროპა და ჩინეთი — უკვე სერიოზული გამოწვევების ქვეშაა

მასკის პოლიტიკურმა არჩევანმა შესაძლოა უკუშედეგი მოიტანოს. იმ ფონზე, როცა Tesla-სთვის უკვე რთულია კონკურენციის პირობებში მსოფლიოს ბაზრებზე არსებობა, აშშ-ის ბაზრის დესტაბილიზაციამ შესაძლოა კომპანიის საერთო პოზიციაც შეარყიოს.

Tesla-მ, როგორც ჩანს, უნდა გადაწყვიტოს — მოერგოს ახალ პოლიტიკურ რეალობას, თუ ხელახლა მოძებნოს თავისი ადგილი როგორც ინოვაციური, კლიმატზე ორიენტირებული ბრენდი.