BYD-ის Seagull ბრენდის ყველაზე გაყიდვადი ელექტრომობილი გახდა
May 5, 2025
აპრილში BYD-ის ყველაზე პოპულარული მოდელი გახდა პატარა, კომპაქტური და ხელმისაწვდომი ელექტრომობილი – Seagull, რომელიც მხოლოდ ერთ თვეში 55,028 ერთეულით გაიყიდა. მას შემდეგ რაც მოდელი გამოჩნდა ლათინურ ამერიკაში და აზიაში, ახლა ის ევროპის ბაზარზეც შედის, ახალი სახელით – Dolphin Surf.
BYD-ის ზრდა ელ-მობილების გლობალურ ბაზარზე უკვე თვალსაჩინოა. მხოლოდ აპრილში ბრენდმა გაყიდა 380,000-ზე მეტი ახალი ენერგიის ავტომობილი, აქედან თითქმის 196,000 იყო სრულად ელექტრული.
Seagull შედის Ocean და Dynasty ხაზებში, რომლებმაც ჯამში 347,000 ავტომობილი გაყიდეს. ასევე ზრდაშია კომპანიის პრემიუმ და ექსკლუზიური ხაზები, თუმცა ყველაზე დიდი ყურადღება სწორედ Seagull-ისკენ მიდის – როგორც პრაქტიკული, ხელმისაწვდომი და ქალაქური ელექტრომობილისკენ.
Seagull უკვე იყიდება მექსიკაში, ბრაზილიაში, ფილიპინებსა და კოლუმბიაში. ევროპაში კი მისი რეალიზება ამ წლის ბოლომდე იგეგმება, სახელით Dolphin Surf.
მოკლე მახასიათებლები:
სიგრძე: 3,780 მმ
სიგანე: 1,715 მმ
სიმაღლე: 1,540 მმ
ბორბლებს შორის მანძილი: 2,500 მმ
აკუმულატორი: 30 ან 38 კილოვატსაათიანი (მოდელის მიხედვით)
სავალი მარაგი: 305 კმ ან 405 კმ (CLTC სტანდარტით)
დიზაინი და აღჭურვილობა
მოდელი შექმნილია ვოლფგანგ ეგერის (ყოფილი Lamborghini-სა და Audi-ს დიზაინერი) ხელმძღვანელობით. მიუხედავად მცირე ზომისა, Seagull გამოირჩევა თანამედროვე დიზაინითა და ჭკვიანი ინტერიერით, რაც მას უფრო მიმზიდველს ხდის როგორც ქალაქის ყოველდღიური საჭიროებისთვის, ისე ახალი მძღოლთათვის.
S&P Global Mobility-ის მონაცემებით, BYD-ის გაყიდვები ევროპაში 2025 წელს სავარაუდოდ გაორმაგდება.