XPeng-მა Tesla-ს Model Y-ის კონკურენტი G7 SUV წარადგინა

XPeng-მა ოფიციალურად წარადგინა ახალი G7 SUV-ის სურათები, რომელიც განიხილება როგორც Tesla-ს Model Y-ის პირდაპირი კონკურენტი. G7-ის წარდგენა დროში ემთხვევა Tesla-ს განახლებული Model Y-ის ტესტირებას ჩინეთში და მიზნად ისახავს EV ბაზრის ერთ-ერთი ლიდერის გამოწვევას.

XPeng-ის "კონკურენტული ფასის" სტრატეგია მიზნად ისახავს ელექტრომობილების საშუალო სეგმენტში პოზიციის გამყარებას. აღნიშნული ნაბიჯი შეიძლება სერიოზულ გამოწვევად იქცეს Tesla-სთვის, განსაკუთრებით ჩინეთში – მსოფლიოში ყველაზე დიდ EV ბაზარზე.

G7-ის გამორჩეული თვისება Hawk AI სისტემაა, რომელიც მომხმარებლებს სთავაზობს ჭკვიან მართვას LiDAR სენსორების გარეშე. XPeng იყენებს კამერებზე დაფუძნებულ სისტემას, რაც ამცირებს ხარჯებს და ინარჩუნებს მძღოლის დამხმარე ფუნქციების მაღალ ხარისხს.

ჩინეთის ელექტრო SUV სეგმენტი დღითი დღე უფრო კონკურენტული ხდება, სადაც G7 მხოლოდ Tesla-ს Model Y-ის კონკურენტი არ არის, არამედ ეჯიბრება ადგილობრივ ბრენდებს, როგორიცაა მაგალითად NIO-ს ONVO L60. მიუხედავად ბაზრის გადატვირთულობისა, XPeng დარწმუნებულია G7-ის პოტენციალში და მას წლის ყველაზე მძლავრ SUV-ად მიიჩნევს თავის სეგმენტში.

XPeng G7 გაყიდვაში 2025 წლის პირველი ნახევრიდან ჩაეშვება.