Volkswagen ბიუჯეტური ელექტრომობილის გამოშვებას გეგმავს

Volkswagen ბიუჯეტური ელექტრომობილის გამოშვებას გეგმავს, რომელსაც სავარაუდოდ ID.1 ერქმევა. ავტომწარმოებელი მოდელის კონცეფციას 2025 წლის მარტშიწარადგენს, ხოლო წარმოება 2027 წელს დაიწყება.

ID.1-ის დიზაინი მკვეთრად გამოირჩევა, მისი ვიზუალური ელემენტები განსხვავდება ID.2all-ისგან. კონცეპტუალური დიზაინი მოიცავს მინიმალისტურ წინა ნაწილს, მრგვალ ფარებს და Volkswagen-ის განათებულ ლოგოს. კომპაქტური ზომის მიუხედავად, ავტომობილს ექნება გაფართოებული ბორბლების ბაზა, რაც მას უფრო დინამიურ იერს აძლევს.

„ჩვენი მიზანია შევქმნათ ხელმისაწვდომი და ხარისხიანი ელექტრომობილი ევროპისთვის, რომელიც ასევე ევროპაში იქნება წარმოებული”, - აცხადებს Volkswagen-ის აღმასრულებელი დირექტორი, თომას შეფერი. 

ID.1 შეიქმნება Volkswagen Group-ის Brand Group Core-ის ქოლგის ქვეშ, რაც გულისხმობს Skoda-ს, SEAT-ის, Cupra-ს და Volkswagen-ის ერთობლივ მუშაობას ახალი მოდელის ოპტიმიზაციისთვის. ეს ერთიანი მიდგომა ბრენდებს საშუალებას მისცემს, შეამცირონ ხარჯები და უზრუნველყონ კონკურენტუნარიანი ფასი.

ახალი ბიუჯეტური ელექტრომობილის გამოშვება ემთხვევა Volkswagen-ის ერთ-ერთ უმნიშვნელოვანეს ცვლილებას – Wolfsburg-ის ქარხნის ტრანსფორმაციას. კომპანიამ დააანონსა, რომ ქარხანა მომავალი ელექტრო Golf-ის და T-Roc-ის წარმოებისთვის მოეწყობა.

ID.1 შეემატება ID.2all-ის სერიულ ვერსიას (ID.Polo), რომელიც 2026 წელს გამოვა. ორივე ავტომობილი დაფუძნებული იქნება Volkswagen-ის განახლებულ MEB პლატფორმაზე და გახდება ელექტრომობილების ახალი თაობის ნაწილი.

Volkswagen-ის ეს ნაბიჯი არა მხოლოდ ახალი მოდელის გამოშვებას ნიშნავს, არამედ - ცვლილებას ელექტრომობილების ხელმისაწვდომობის მიმართულებით, რაც ევროპელ მძღოლებს დაბალფასიან, ეკომეგობრულ ტრანსპორტზე გადართვის საშუალებას მისცემს.