მოულოდნელი ფაქტი: ძლიერ აჩქარებას შეუძლია EV ბატარეის სიცოცხლე 195 000 კილომეტრით გაახანგრძლივოს!
Oct 21, 2025
ელექტრომობილების მფლობელებს წლების განმავლობაში ასწავლიდნენ, რომ სიფრთხილე ბატარეის ხანგრძლივობის მთავარი პირობა იყო - არ უნდა დაგეჩქარებინა, არ უნდა დაგემუხტა ბოლომდე და რაც შეიძლება „რბილად“ უნდა გემართა.
თუმცა სტენფორდის უნივერსიტეტისა და SLAC National Accelerator Laboratory-ს ახალმა კვლევამ აჩვენა, რომ რეალურ ცხოვრებაში ყველაფერი პირიქითაა: ენერგიული აჩქარება და ცვალებადი მართვა ბატარეის სიცოცხლეს დაახლოებით 38%-ით ახანგრძლივებს, რაც საშუალოდ 195 000 დამატებით კილომეტრს ნიშნავს.
კვლევა გამოქვეყნდა ცნობილ სამეცნიერო ჟურნალ Nature Energy-ში და უკვე განიხილება, როგორც ერთ-ერთი ყველაზე მნიშვნელოვანი მიღწევა EV-ტექნოლოგიების ოპტიმიზაციის მიმართულებით.
მეცნიერთა გუნდმა ორ წელზე მეტი ხნის განმავლობაში ტესტირებაში გამოიყენა 92 კომერციული ლითიუმ-იონური ბატარეა. ტესტის მიზანი იყო შეედარებინათ ლაბორატორიული პირობებით მიღებული მონაცემები რეალურ გარემოში ჩატარებულ დაკვირვებებთან.
შედეგი მოულოდნელი აღმოჩნდა: ლაბორატორიაში ბატარეების სიცოცხლის ციკლი შედარებით მოკლე იყო, მაშინ როცა რეალურ პირობებში - ხშირი აჩქარებების, დამუხრუჭების და დატვირთვის ცვალებადობის პირობებში - ბატარეები ბევრად უფრო დიდხანს ინარჩუნებდნენ წარმადობას.
მეცნიერების განმარტებით, ეს უკავშირდება ბატარეის შიდა ქიმიურ პროცესებს: როცა ბატარეა მუშაობს ციკლურად და ინტენსიურად, იონები უფრო ეფექტურად მოძრაობენ და სითბოს განაწილება უკეთესად ხდება. შედეგად, ბატარეა ნაკლებად ზიანდება და ნელა „ბერდება“.
კვლევის შედეგებმა უკვე წამოიწყო დისკუსია EV-ინდუსტრიაში. ექსპერტები მიიჩნევენ, რომ საჭიროა ბატარეების ტესტირების ახალი სტანდარტების შემოღება, რომლებიც რეალურ პირობებს გაითვალისწინებს და არა მხოლოდ ლაბორატორიულ გარემოს.
ასევე სავარაუდოა, რომ ბატარეის მართვის სისტემები (BMS) მომავალში ახალ ალგორითმებზე დაფუძნდეს - ისეთებზე, რომლებიც ენერგიულ მართვასა და დროდადრო აჩქარებას ბატარეისთვის ნორმალურ და ჯანმრთელ ციკლად აღიქვამს.