Tesla-მ კიდევ ერთი მაღალი თანამდებობის პირი დაკარგა – ილონ მასკის ერთ-ერთი ყველაზე ახლო მრჩეველი კომპანიიდან წავიდა
Jun 27, 2025
Tesla-ს ტოპ-მენეჯერი და ილონ მასკის ერთ-ერთი ყველაზე ნდობით აღჭურვილი პირი, ომიდ აფშარი, კომპანიას დატოვებს – ამის შესახებ ინფორმაცია სამი საქმეში ჩახედული წყაროსგან გავრცელდა. აფშარი 2023 წლიდან იყო ჩრდილოეთ ამერიკასა და ევროპაში გაყიდვებისა და წარმოების ზედამხედველი.
აფშარი 2017 წელს შეუერთდა Tesla-ს და სწრაფად იქცა მასკის ერთ-ერთ მთავარ ლეიტენანტად, განსაკუთრებული როლი ითამაშა ისეთ მნიშვნელოვან პროექტებში, როგორიცაა ტეხასის Gigafactory-ს აშენება.
წყაროების ცნობით, მისი წასვლის დეტალები და მიზეზები ჯერ უცნობია.
აფშარი კომპანიიდან მიდის ისეთ დროს, როცა Tesla-ს ევროპასა და ჩრდილოეთ ამერიკაში მოთხოვნა შესამჩნევად ეცემა – განსაკუთრებით ბოლოდროინდელი მოდელების დაბერების ფონზე და კონკურენტების უფრო ხელმისაწვდომი ალტერნატივების გამოჩენით.
რამდენიმე პირის თქმით, აფშარი იმ მენეჯერებს შორის იყო, რომლებმაც მასკის ვაშინგტონში საქმიანობის პერიოდში დამატებითი პასუხისმგებლობები აიღეს. აღსანიშნავია, რომ ამავე პერიოდში Tesla-ს უკვე უმკლავდებოდა გაყიდვების შემცირებით გამოწვეულ მნიშვნელოვან გამოწვევებს.
Tesla-ს ყოფილი გაყიდვების მენეჯერი მეთიუ ლაბროტი, რომელიც ცოტა ხნის წინ მასკის საჯარო კრიტიკის გამო გაათავისუფლეს, ამბობს, რომ აფშარი იყო „მთავარი მხარდამჭერი პერსონაჟი“, რომელიც მასკთან მჭიდრო კავშირში იყო და შემდეგ ევროპისა და ჩრდილოეთ ამერიკის გაყიდვებისა და წარმოების ხელმძღვანელობამდე გაიზარდა.
კადრების გადინება გრძელდება
ბოლო 14 თვის განმავლობაში Tesla-დან არაერთი მაღალი თანამდებობის პირი წავიდა – უმეტესად მასშტაბური რესტრუქტურიზაციის, ათასობით თანამშრომლის გაშვების და კომპანიის ფოკუსის ხელოვნურ ინტელექტსა და რობოტექნოლოგიებზე გადატანის ფონზე.
გასული თვეების განმავლობაში კომპანია დატოვეს ისეთმა ლიდერებმა, როგორიცაა ოპტიმუსის ჰუმანოიდი რობოტის ხელმძღვანელი მილან კოვაჩი, ბატარეების ტოპ-ექსპერტი ვინიტ მეჰტა, ბატარეების მთავარი ინჟინერი დრიუ ბაგლინო, სწრაფი დამუხტვის ქსელის ხელმძღვანელი რებეკა ტინუჩი და გლობალური საჯარო პოლიტიკის ხელმძღვანელი როჰან პატელი.
აფშარის წასვლის შესახებ პირველად Bloomberg-მაც გაავრცელა ინფორმაცია, რომელმაც ასევე დაწერა, რომ Tesla-ს ჩრდილოეთ ამერიკის HR დირექტორი ჯენა ფერუა კომპანიიდან წავიდა. რამდენიმე წყაროს თქმით, აფშარი და ფერუა კოლეგიალურად ახლო კავშირში იყვნენ.
რობოტაქსების გამოწვევა და ინვესტორთა მოლოდინი
მიუხედავად იმისა, რომ მასკმა მაისში დაასრულა საქმიანობა ვაშინგტონში და ინვესტორების ნაწილს დაამშვიდა, Tesla-ს აქციები წლიურად 19%-ით არის დაცემული. ამასობაში, კომპანია აგრძელებს თვითმართვადი ტაქსების გამოშვებას: მაგალითად, ამ კვირაში Tesla-მ თვითმართვადი ტაქსები გააგზავნა ტეხასში.