Jaguar ბრუნდება: ბრენდის პირველი ახალი თაობის ელექტრო მოდელი 2026 წელს გამოვა
Dec 18, 2025
Jaguar ოფიციალურად აგრძელებს სრულად ელექტრო მომავალზე გადასვლას და 2026 წელს ბრენდი წარადგენს ახალ, ფლაგმანურ ელექტრო მოდელს, რომელიც Jaguar-ის ისტორიის ერთ-ერთ ყველაზე მძლავრ და ტექნოლოგიურად დახვეწილ ავტომობილად მოიაზრება.
ახალი მოდელი იქნება ოთხკარიანი, დიდი ზომის ელექტრო GT და სწორედ ის გახსნის Jaguar-ის ახალ ელექტრო ეპოქას. ავტომობილის სრული პრეზენტაცია 2026 წლის ზაფხულში იგეგმება, ხოლო ტესტ-დრაივები წლის ბოლოს დაიწყება.
რა ვიცით ახალ Jaguar EV-ზე
პროტოტიპის პირველადი ტესტირების საფუძველზე უკვე დადასტურებულია რამდენიმე მნიშვნელოვანი დეტალი:
ავტომობილი აღჭურვილია სამძრავიანი სისტემით - ორი ძრავი უკანა ღერძზე და ერთი წინა ნაწილში
ჯამური სიმძლავრე 1 000 ცხენის ძალას აღემატება
გამოიყენება ტორქ-ვექტორინგი უკანა ღერძზე, რაც მართვას უფრო ზუსტს და დინამიკურს ხდის
აქვს უკანა ბორბლების მართვის სისტემა, რომელიც ამცირებს მოხვევის რადიუსს და ზრდის სტაბილურობას
აღჭურვილია ჰაერის საკიდრით, ორმაგი ამორტიზაციით და სპორტზე მორგებული შასით
სამიზნე სავალი მარაგი დაახლოებით 640 კმ-მდეა
დიდი საბორბლე ბაზისა და იდეალური 50:50 წონის განაწილების გამო, მძღოლი ზუსტად ავტომობილის ცენტრში ზის, რაც მწარმოებლის თქმით, „მიდ-ენჯინიანი სპორტქარის შეგრძნებას“ ქმნის - მიუხედავად იმისა, რომ ავტომობილი ხუთ მეტრზე მეტია სიგრძეში.
პირველი ტესტირების შთაბეჭდილებით, ახალი Jaguar EV ორიენტირებულია არა აგრესიულ სპორტულობაზე, არამედ სწრაფ, სტაბილურ და კომფორტულ გადაადგილებაზე. ავტომობილი ძლიერია, თუმცა აჩქარება რბილი და პროგრესულია.
მიუხედავად დიდი ზომისა და სავარაუდოდ დაახლოებით 2.5 ტონა წონისა, დაკიდების სისტემა ეფექტურად ამუშავებს გზის არათანაბრობებს. მანქანა უფრო სპორტულია, ვიდრე Rolls-Royce, მაგრამ უფრო რბილი და კომფორტული, ვიდრე ბევრი გერმანული პრემიუმ კონკურენტი.
Jaguar უარს ამბობს ყალბი გადაცემათა კოლოფის იმიტაციაზე. ხელოვნური ხმა კი იქნება ხელმისაწვდომი, თუმცა მხოლოდ სურვილის შემთხვევაში და მძღოლს შეეძლება მისი გამორთვა ან ინტენსივობის რეგულირება.
კომპანიის თქმით, ხმა არ იქნება „კოსმოსური“ და შეინარჩუნებს ბრენდის ელეგანტურ ტონს.
Jaguar ცდილობს ბრენდის სრულ რებრენდინგს და ისტორიული სახელის ახალ რეალობაში გადატანას. ახალი ელექტრო GT არის ტექნოლოგიურად ძლიერი, ვიზუალურად მასშტაბური და მკაფიოდ პოზიციონირებული ავტომობილი, რომელიც ბრენდს ძველი კონკურენციისგან აშორებს.