Amazon-მა ელექტრო სატვირთოების ყველაზე მასშტაბური შეკვეთა გააკეთა
Jan 17, 2025
Amazon-მა ისტორიაში ყველაზე დიდი ელექტრო მძიმე სატვირთოების (eHGV) შეკვეთა გააკეთა. კომპანიამ 200-ზე მეტი ბატარეაზე მომუშავე Mercedes-Benz eActros 600 ნახევრადსატვირთო იყიდა. გრძელ მანძილზე მავალი ელექტრო სატვირთოები Amazon-ის ფლოტს დიდი ბრიტანეთსა და გერმანიაში 2025 წელს შეუერთდება, რაც კომპანიის საშუალო მანძილის გადაზიდვების ელექტრიფიკაციისკენ გადადგმული მნიშვნელოვანი ნაბიჯია.
eActros 600 შექმნილია გრძელ მანძილზე სატვირთო გადაზიდვებისთვის და გამოირჩევა:
600 კილოვატსაათიანი ბატარეით, რაც უზრუნველყოფს 500 კმ სვლის მანძილს 40-ტონიანი სრული დატვირთვისას;
პოტენციურად 1,000 კმ ყოველდღიური დაფარვის შესაძლებლობით, დატენვისა და მძღოლის შესვენების ოპტიმიზაციის პირობებში;
400 კილოვატიანი სწრაფი დამუხტვის მხარდაჭერით (CCS კაბელით), მომავალში მეგავატის დამუხტვის (MCS) მხარდაჭერის პერსპექტივით, რაც 20%-დან 80%-მდე დამუხტვას 30 წუთში შესაძლებელს გახდის.
Amazon ფართოდ არის ცნობილი Rivian-ის მიერ წარმოებული ელექტრო მიკროავტობუსებით. თუმცა, კომპანია უფრო მასშტაბურ ელექტრიფიკაციას განახორციელებს, რაც ელექტრო სატვირთოების დანერგვას გულისხმობს და მომავალში ლოჯისტიკის ინდუსტრიას გარდაქმნის.
Amazon-ის ნაბიჯი აჩვენებს კომპანიის მზადყოფნას ეკოლოგიურად სუფთა ლოჯისტიკისკენ და ქმნის პრეცედენტს ელექტრო სატვირთოების ფართო გამოყენებისთვის.