Amazon-ი ტესტავს ჰუმანოიდ რობოტებს – მალე ამანათებს სახლებში რობოტები დაარიგებენ
Jun 5, 2025
Amazon-ი სულ მალე დაიწყებს ჰუმანოიდი რობოტების ტესტირებას ამანათების მიტანისთვის. კომპანიის გეგმაა, რომ რობოტები Rivian-ის ელექტროვანებიდან გადმოვიდნენ და პაკეტები პირდაპირ კართან მიიტანონ.
ამ დროისთვის ამაზონი იყენებს 20,000-ზე მეტ Rivian-ის ელექტრო ვანს, ხოლო ამ რაოდენობის 100,000-მდე გაზრდას აპირებს დეკადის ბოლომდე. თუმცა ახლა პაკეტებს ადამიანები ატარებენ, მომავალში კი ამ ფუნქციას შესაძლოა რობოტები შეითავსონ.
ტესტირების ზონა – „ჰუმანოიდ პარკი“
San Francisco-ში უკვე მზადდება სპეციალური ტესტირების სივრცე – „ჰუმანოიდ პარკი“, რომელიც იმიტირებს ნამდვილ მიტანის პირობებს. იქ განთავსებულია Rivian-ის ელექტროვანიც, საიდანაც რობოტები გადმოდიან და ცდილობენ პაკეტის მომხმარებლამდე მიტანას.
ამ ეტაპზე კომპანია გეგმავს სხვადასხვა ტიპის ჰუმანოიდის დატესტვას. აქედან ერთ-ერთი ჩინური კომპანია Unitree-ს რობოტია.
Amazon-ი უკვე მრავალი წელია იყენებს რობოტებს საკუთარ საწყობებში, თუმცა ისინი სპეციალურად ამ მიზნებისთვის შექმნილი მოწყობილობებია. ჰუმანოიდ რობოტების გამოყენების გამოცდილება კი კომპანიისთვის ახალი სფეროა.