Tesla Model Y Standard: დაბალი ფასი, მაგრამ კომპრომისი კომფორტსა და ელეგანტურობაზე

Tesla-მ ახალი, უფრო ხელმისაწვდომი ვერსია Model Y Standard გამოუშვა, რომელიც მიზნად ისახავს ელექტრომობილობის უფრო ფართო ხელმისაწვდომობას. თუმცა, როგორც Auto Week-ის დეტალური მიმოხილვა მიუთითებს, დაბალ ფასს თან სდევს გარკვეული შეზღუდვები, რომლებიც აშკარად განასხვავებს მას ბრენდის პრემიუმ ვერსიებისგან.

Tesla Model Y Standard გამოირჩევა გამარტივებული დიზაინით და შედარებით მოკრძალებული ინტერიერით. Auto Week-ის შეფასებით, ახალი მოდელი Tesla-ს „back to basics“ - ანუ „ფუნდამენტებზე დაბრუნების“ ფილოსოფიას ატარებს.

გარეგნულად მას არ აქვს განახლებული Model Y-ისათვის დამახასიათებელი შუქების ზოლი და წინა ბამპერის დამატებითი სლოტები, რაც ავტომობილს უფრო უბრალო იერს აძლევს.

შიგნით კი Tesla-მ სინთეზური ტყავის ნაცვლად გამოიყენა ტექსტილის upholstery, ხოლო პანორამული მინის სახურავი დაფარა შიდა საფარით - ხარჯების შესამცირებლად.

განსაკუთრებული კრიტიკის ობიექტად იქცა სავარძლების რეგულირების სისტემა, რომელიც სრულად იმართება ცენტრალური ეკრანიდან და არა ფიზიკური ღილაკებით - რაც, როგორც მიმომხილველები ამბობენ, ბევრ მძღოლს შეიძლება არასასიამოვნოდ მოეჩვენოს. მიუხედავად ამისა, ინტერიერი კვლავ რჩება ფუნქციურად გამართული და კომფორტული თავისი ფასის კატეგორიისთვის.

Model Y Standard ეფუძნება უკანა წამყვან პლატფორმას და კომპლექტდება 18-დუიმიანი დისკებით. მისი დინამიკა შედარებით მოკრძალებულია - 0-100 კმ/სთ აჩქარება 7.2 წამში, მაქსიმალური სიჩქარე კი 201 კმ/სთ.

Auto Week-ის თანახმად, სავალი ნაწილი ნაკლებად დახვეწილია, რადგან Tesla-მ გამოიყენა ძველი ტიპის საკიდარი სისტემები და არა განახლებული ადაპტური ამორტიზატორები, რომლებიც გვხვდება ახალ, უფრო ძვირ ვერსიებში. შედეგად, მართვის შეგრძნება უფრო მყარია და ნაკლებად რბილი.

თუმცა, Tesla-ს სიძლიერე კვლავ რჩება ტექნოლოგიაში - Model Y Standard მაინც უზრუნველყოფს 534 კმ WLTP დიაპაზონს, 175 კვტ სწრაფ დამუხტვას და 1,600 კგ-მდე ტვირთის ბუქსირების შესაძლებლობას.

Tesla-ს სტრატეგია: ხელმისაწვდომი ელექტრომობილობა

Model Y Standard-ის გამოშვება ასახავს Tesla-ს მცდელობას, შეინარჩუნოს ბაზრის წილი იმ ფონზე, როცა კონკურენცია ძლიერდება - განსაკუთრებით ევროპასა და ჩინეთში, სადაც უფრო იაფი ჩინური მოდელები აქტიურად იპყრობენ მომხმარებლების ყურადღებას.

მიუხედავად შემცირებული ელეგანტურობისა, Model Y Standard შესაძლოა გახდეს Tesla-ს ახალი გაყიდვების წამყვანი სეგმენტში, სადაც მყიდველებისთვის გადამწყვეტი მნიშვნელობა სწორედ ფასს აქვს და არა სრული ფუფუნების პაკეტს.