CATL-მა ევროპისთვის ახალი ბატარეა წარადგინა: 1 მილიონი კმ რესურსი და 10-წუთიანი დამუხტვა
Sep 12, 2025
ჩინეთის წამყვანმა ბატარეების მწარმოებელმა CATL-მა (Contemporary Amperex Technology Co. Limited) მიუნხენის ავტოშოუზე ახალი თაობის Shenxing Pro LFP ბატარეები წარადგინა, რომლებიც სპეციალურად ევროპული ბაზრისთვის შეიქმნა. კომპანიის თქმით, ეს ტექნოლოგია ერთდროულად პასუხობს მძღოლების სამ მთავარ შეშფოთებას: გარბენი, დამუხტვის სისწრაფე და ბატარეის ხანგრძლივი სიცოცხლე.
ორი ვერსია - გრძელგზიანი და სწრაფად დამტენი
CATL-მა Shenxing Pro ორ ვერსიაში წარმოადგინა:
Super Long Life & Long Range Battery - WLTP სტანდარტით იძლევა 756 კმ-მდე სვლას და 122 კილოვატსაათიან ტევადობას. სწრაფი დამუხტვა 10%-დან 80%-მდე მხოლოდ 15 წუთს მოითხოვს, რაც რეალურ პირობებში 400 კმ-მდე სვლას ნიშნავს.
Super-Fast Charging Battery - 110 კილოვატსაათიანი ბატარეა, რომელიც 10%-დან 80%-მდე მხოლოდ 10 წუთში იტენება. WLTP სტანდარტით ეს 478 კმ-ს იძლევა.
ხანგრძლივობა და საიმედოობა
CATL-ის განცხადებით, Shenxing Pro-ს ბატარეები გამორჩეულია მდგრადობით:
200,000 კმ გავლის შემდეგაც კი მხოლოდ 9%-იან დეგრადაციას აჩვენებს.
ინარჩუნებს 70%-იან ტევადობას 1 მილიონ კმ-ზე და 10,000 დამუხტვა/განმუხტვის ციკლის შემდეგაც.
ეს მონაცემები აჩვენებს, რომ Shenxing Pro-ს სიცოცხლის ხანგრძლივობა მინიმუმ 1 მილიონ კმ-მდეა გათვლილი.
CATL იყენებს „Wave Cells“-ის მოდულურ კონსტრუქციას, რაც საშუალებას იძლევა ბატარეაში მეტი აქტიური მასალა მოთავსდეს და ენერგიის სიმკვრივე გაიზარდოს. ეს განსაკუთრებით მნიშვნელოვანია LFP (ლიTიუმ-რკინა-ფოსფატის) ბატარეებისთვის, რომლებიც ტრადიციულად უფრო მძიმეა, თუმცა გამძლეობითა და უსაფრთხოებით გამოირჩევა.
CATL უკვე $12.9 მილიარდს აბანდებს ევროპაში. კომპანიის მიზანია შექმნას სრული ეკოსისტემა - მასალების წარმოებიდან და ბატარეების ქარხნებიდან, გადამუშავებასა და რემანუფაქტურაციამდე. საწარმოო ობიექტები უკვე შენდება უნგრეთში, გერმანიასა და ესპანეთში.
CATL Shenxing Pro შეიძლება გახდეს ევროპული EV ბაზრის გარდამტეხი ტექნოლოგია - ბატარეა, რომელიც სწრაფად იტენება, დიდ გარბენს იძლევა და თითქმის ორჯერ აღემატება ტრადიციული ბატარეების სიცოცხლის ხანგრძლივობას.